Wexto kı qeçek newe dındani vejeno, ey rê danugı vırazenê u kenê pıro. Vıraştena danugı roşanê qeçkano. Wexto kı keyeyê danugı vırazeno veyndano heme qeçandê werdiyandê mahla, embıryanan, dost u sınasnayan. Qeçeki amey u resay pê tepeya, qeçeko kı newe dındani vetê ey gênê u anê cılê yan zi şalêda pakı sero ronanê (roşanenê). Roşana tepey a lengeri sero a danugı anê ey sere ra kenê war. Kerdı war tepeya qeçekê kı ameyê ê a danugı çorşmeydê ê qeçeki ra arêkenê. (Wexto kı ê qeçeki anê roşanenê, verê coy serey cı pak şüwenê u çınay ci yê pakê weşi danê pıra)
Çiyo kı, malzemeyo kı beno tewrdê vıraştenda danugı, dan, nıhey, fasulyey, beqley, lobıki u wınasin. Nê çiyan veri peyşnenê (Awı dı xaşeynenê) u kenê hadre. labırê wexto kı peyşnenê, vanê bol nêpeyşnê kı cêser nêkewê u vılla nêbê. Yanê vanê heb-heb bımanê kı qeçeki bışê arêkerê. Pewti tepeya inan kenê perzun, süzgeç yan zi elegı ro u awa miyandê cı rêj kenê, rıjnenê u ê hebanê cı teniya verdanê. Bahdo ê hemını anê kenê têmıyan u şanenê pê. Bahdê inan anê dendıkê gozan, vaman, eskızi, fıstıxi, dendıkê maşelay (Vıllıka verdê rozi) ê pıraynayan, ıncilê wışki, şeker u perey werdiyan zi kenê miyan. Nê hemını fına bahdoyênı şanenê pê. heme rınd şanay pê tepeya nanê sêniyê yan zi lengeriyê ser u anê seredê ê qeçeki ra kenê war. Kerdi pıro tepeya qeçekê kı ameyê zey vergana sero kom benê pêser u pê vera ê çiyan arêkenê. Sıfte en bol ki miyan dı geyrenê perey werdi, dendıkê vam u gozan, fıstıx u ıncilan. Ê miyan ra weçinay tepeya no fın dest bı ê çidê bini kenê.
Wexto kı arêkenê tay-taydê çımakerdey hıma vıradanê xo tunıki kı dıha vêşi arêkerê. Tay-tay zi herunı dı erzenê xo fek u wenê.
Kes şeno na danugı vıraştenı u vıllakerdenı rê vajo veyvey qeçkanê danugı. Bahdê vıraştenı u rıjnayenda danugı, jew, jew keye şerbet yan zi çina vırazeno u bı ê qeçkana dano werdenı. Tay-tay keyey zi şiraney yan zi werd vırazenê u danê ê qeçkan. qandê coy kes ney rê vano veyve yan zi roşanê qeçkanê danugı.
